နောင်မင်းသူ၊ နိရဉ္စရာ၊ မတ် ၁၉ /၂၀၂၅
ရခိုင်ပြည်၊ ရသေ့တောင်မြို့နယ်၊ အငူမော်-ကုလားချောင်းကျေးရွာကို စစ်ကောင်စီက ဗုံးလာကြဲရန် သတင်းပေးခဲ့သူအား အာရက္ခတပ်တော်(AA)က ဖမ်းမိထားသည်ဟု ဒေသခံများက ပြောသည်။
AA က ဖမ်းမိထားသူမှာ ရသေ့တောင်မြို့နယ်၊ အငူမော်-ကုန်တန်း(ခေါ်)ချောင်းရဲကုန်တန်းကျေးရွာမှ အမျိုးသားတစ်ဦးဖြစ်ပြီး ဗုံးလာကြဲအပြီး နောက်တစ်နေ့ မတ်လ ၁၆ ရက်တွင် စကားပြောစက်နှင့်အတူ ဖမ်းမိခဲ့ခြင်းဖြစ်သည်ဟု အဆိုပါကျေးရွာမှ မျက်မြင်ဒေသခံတစ်ဦးက နိရဉ္စရာကို ပြောသည်။
“အငူမော်ဖက်ကနေ စစ်တွေဖက်ကို လက်နက်ကြီးပစ်နေတယ်ဆိုပြီး စစ်ကောင်စီတပ်ဖက်ကို သတင်းပေးနေတဲ့ ကုန်တန်းရွာသားတစ်ဦးက သတင်းပေးနေတာကို စကားပြောစက်နဲ့အတူ AA ထောက်လှမ်းရေးက ဖမ်းဆီးနိုင်ခဲ့တယ်”ဟု ပြောသည်။
ဖမ်းဆီးခံထားရသူ၏အမည်နှင့် အသက်ကို နိရဉ္စရာက စုံစမ်းနေဆဲဖြစ်သည်။
သူသည် အငူမော်နှင့် မြစ်တစ်ဘက်ကမ်း စစ်တွေမြို့အနီးရှိ စစ်ကောင်စီတပ်ထံ ဆက်သွယ်ရေးစကားပြောစက်ဖြင့် လှမ်း၍ သတင်းပေးပို့ခဲ့ခြင်းဖြစ်သည်ဟု ဒေသခံများက ပြောသည်။
ယင်းသို့ သတင်းပေးပြီးနောက် ပြီးခဲ့သည့် မတ်လ ၁၅ ရက်၊ ညအချိန်တွင် စစ်တွေတစ်ဘက်ကမ်း အငူမော်အနီးရှိ ကုလားချောင်းကျေးရွာအား စစ်ကောင်စီတပ်က အသံတိတ်ဒရုန်းတစ်စီးဖြင့် လာရောက်ဗုံးကြဲချခဲ့ခြင်းဖြစ်သည်ဟု အငူမော်ဒေသခံတစ်ဦးက ပြောသည်။
“စစ်ကောင်စီဖက်ကလာပြီး ကုလားချောင်းကျေးရွာကို ဟိုတစ်နေ့က အသံတိတ်ဒရုန်းနဲ့ဗုံးကြဲခဲ့တယ်။ ထိခိုက်သေဆုံးမှုတော့ မရှိခဲ့ဘူး။ အခု စစ်ကောင်စီဒရုန်းတွေက အရင်ကလို အသံမကြားရဘူး။ အတော်လေးစိုးရရိမ်စရာဖြစ်လာပါတယ်”ဟု ပြောကြားသည်။
သို့သော် စစ်ကောင်စီတပ်က ကုလားချောင်းကျေးရွာကို မှားယွင်း ဗုံးကြဲခြင်းသာဖြစ်ပြီး တည်ငြိမ်အေးချမ်းနေသည့် ထိုကျေးရွာတွင် မည်သည့်လက်နက်ကိုင်တပ်ဖွဲ့များမှ မရှိကြောင်း ဒေသခံများက ပြောသည်။
ယခုဖမ်းဆီးထားသူနှင့်ပတ်သက်ပြီး AA က တစ်စုံတရာ ထုတ်ပြန်ခြင်းမရှိသေးသလို AA ပြောခွင့်ရသူ ဦးခိုင်သုခကိုလည်း နိရဉ္စရာက ဆက်သွယ်မေးမြန်းထားဆဲဖြစ်သည်။
လက်ရှိတွင် စစ်တွေမြို့ပေါ်နှင့် မြို့နယ်တွင်းရှိ စစ်ကောင်စီတပ်စခန်းများကို AA က ထိုးစစ်ဆင်တိုက်ခိုက်လျက်ရှိနေသည်။
စစ်ကောင်စီကလည်း ရသေ့တောင်၊ ပုဏ္ဏားကျွန်းနှင့် ပေါက်တောစသည့်မြို့နယ်များဖက်မှ လက်နက်ကြီးများပစ်ခတ်နေသည်ဟု ယူဆမှုများကြောင့် အဆိုပါမြို့နယ်များမှ စစ်တွေနှင့်နီးကပ်သည့် လူနေကျေးရွာများကို အသံတိတ်ဒရုန်းများ၊ လက်နက်ကြီးများနှင့် လေကြောင်းတို့မှ ဗုံးကြဲတိုက်ခိုက်လျက်ရှိနေကြောင်း ဒေသခံများထံမှ သိရသည်။
ဓာတ်ပုံ – AA တပ်ဖွဲ့ဝင်အချို့အား တွေ့ရစဉ်။ (ပုံဟောင်း
